మూసీలో పొంగుతున్న రాజకీయ కాలుష్యం
హైదరాబాద్, మార్చి 11, (వాయిస్ టుడే )
Political Pollution Surging in the Musi
హైదరాబాద్కు ఇప్పుడు కొత్త జ్వరం పట్టుకుంది. అదే.. ‘మూసీ ఫీవర్’. నదిని శుద్ధి చేస్తామని ఒకరు అంటే, ఆ ప్రాజెక్టు వెనుక ‘అతివృష్టి’ (అవినీతి) ఉందని మరొకరు, అసలు తాము వస్తే మూసీని ‘అమృతం’లా మార్చేవాళ్ళమని ఇంకొకరు.. మొత్తానికి మూసీ నీళ్ళ కంటే, మూసీపై జరుగుతున్న రాజకీయ కాలుష్యమే ఇప్పుడు సిటీలో హాట్ టాపిక్.మన రాజకీయ నాయకులకు ఏదైనా ప్రాజెక్టు అంటే మొదట గుర్తొచ్చేది ‘విగ్రహం’. మూసీ ప్రాజెక్టు అంచనా వ్యయం రూ. 5,000 కోట్లు దాటినా, ప్రతిపక్షాలకు మాత్రం అందులో కనిపించేది కేవలం ఒక విగ్రహం మాత్రమే! “అమ్మో! విగ్రహానికి వంద కోట్లా?” అంటూ ఒక వర్గం గగ్గోలు పెడుతుంటే, అటువైపు ప్రభుత్వం ఏమో “మేము చేసేది నది ప్రక్షాళన, విగ్రహం ఒక్కటే కాదు” అని వివరణ ఇచ్చుకోలేక పడుతున్న పాట్లు చూస్తుంటే.. అసలు ప్రాజెక్టు దేనికో, అది దేనికో అర్థం కాక సామాన్యుడు తల పట్టుకుంటున్నాడు.సీఎం రేవంత్ రెడ్డి గారి ఉద్దేశం చూస్తుంటే, హైదరాబాద్ను లండన్ థేమ్స్ నది రేంజ్లోకి తీసుకెళ్లాలని ఉంది. “సబర్మతిని అభివృద్ధి చేయొచ్చు, యమునను బాగు చేయొచ్చు.. మరి మన మూసీని ఎందుకు చేయకూడదు?” అని ఆయన అడుగుతుంటే, ప్రతిపక్షాలు “మీరు చేసేది అభివృద్ధి కాదు, ‘లూటిఫికేషన్’” అని ఎదురుదాడి చేస్తున్నాయి. చివరకు పరిస్థితి ఎలా ఉందంటే, మూసీలో నీళ్లు పారడం సంగతి పక్కన పెడితే, మాటల యుద్ధం మాత్రం వరదలా పారుతోంది.ఏ రాజకీయ గొడవైనా చివరకు ‘లీగల్ నోటీసుల’ దగ్గర ఆగుతుంది. ప్రాజెక్టుపై ఆరోపణలు చేసిన బీఆర్ఎస్ నేతలకు ఏకంగా లీగల్ నోటీసులు రావడంతో.. ఇప్పుడు అసలు పోరాటం ‘వాస్తవాల’ మీద జరుగుతుందా లేక ‘కోర్టు మెట్ల’ మీద జరుగుతుందా అనే అనుమానం రాక మానదు. ఆరోపణలు చేయడం, నోటీసులు రావడం, మళ్లీ ప్రెస్ మీట్లు పెట్టడం.. ఇదంతా చూస్తుంటే హైదరాబాద్ అభివృద్ధి ఏమో కానీ, లాయర్ల ఆదాయం మాత్రం ఖచ్చితంగా పెరిగేలా ఉంది! అసెంబ్లీలో సీఎం రేవంత్ రెడ్డిగారు పవర్ పాయింట్ ప్రజెంటేషన్ ఇవ్వబోతున్నారు. ప్రభుత్వం తన వాదనను ప్రజల్లోకి తీసుకెళ్లడంలో ఫెయిల్ అయ్యిందనే విమర్శలకు, ఈ ప్రజెంటేషన్ చెక్ పెడుతుందా? లేక ఆ ప్రజెంటేషన్ను చూసి ప్రతిపక్షాలు మరో రకమైన విమర్శలకు సిద్ధమవుతాయా? అన్నదే అసలైన సస్పెన్స్.నది కలుషితమైతే నీటిని శుద్ధి చేయొచ్చు. కానీ, రాజకీయాల్లో కలుషితమైన అభిప్రాయాలను శుద్ధి చేయడానికి ఏ ప్లాంట్ పనికొస్తుంది? కేవలం విగ్రహాలు, విమర్శల చుట్టూ తిరిగితే, మూసీ ప్రక్షాళన అనేది నగరానికి ఒక ‘స్వప్నం’గానే మిగిలిపోయే ప్రమాదం ఉంది. ప్రభుత్వం చెప్పే ‘గ్లోబల్ సిటీ’ కల నెరవేరాలంటే, ప్రజలకు కావాల్సింది పవర్ పాయింట్ ప్రజెంటేషన్లు మాత్రమే కాదు.. పారదర్శకమైన పాలన, క్షేత్రస్థాయిలో భరోసా!
