కాంగ్రెస్ తెచ్చిన కరువుతో రైతులు అల్లాడుతున్నారు: కేటీఆర్
కాంగ్రెస్ సినిమా అట్టర్ ఫ్లాప్.. మరో 29 నెలల్లో ప్రజలే తీర్పు చెబుతారు
మంచిర్యాల, జూలై 22 (వాయిస్ టుడే న్యూస్):
Farmers are suffering due to the drought caused by the Congress: KTR
కాంగ్రెస్ ప్రభుత్వం ఎన్నికల్లో ఇచ్చిన హామీలను అమలు చేయకుండా అన్ని వర్గాలను మోసం చేసిందని బీఆర్ఎస్ వర్కింగ్ ప్రెసిడెంట్ కేటీఆర్ ఆరోపించారు. కాంగ్రెస్ పాలనలో రైతులు కరువుతో తీవ్ర ఇబ్బందులు ఎదుర్కొంటున్నారని, రాష్ట్రంలో మళ్లీ రైతు ప్రభుత్వం రావాలంటే ప్రజలు కాంగ్రెస్కు గట్టి బుద్ధి చెప్పాలని పిలుపునిచ్చారు.
మంగళవారం లక్సెట్టిపేటలోని శ్రీ వాసవి గార్డెన్స్లో నిర్వహించిన రైతు సదస్సులో కేటీఆర్ పాల్గొని ప్రసంగించారు.
యువతకు “యూత్ డిక్లరేషన్” పేరుతో హామీలు ఇచ్చి కాంగ్రెస్ ప్రభుత్వం మోసం చేసిందని, ఆ అంశంపై నిర్వహించిన యువ సంగ్రామ సదస్సులో యువత ప్రభుత్వం వైఫల్యాలను ఎండగట్టిందని అన్నారు. ఇప్పటికే కాంగ్రెస్ ప్రభుత్వం 31 నెలలు పూర్తి చేసుకుని అన్ని వర్గాలను నిరాశపరిచిందని, మిగిలిన 29 నెలల్లో ప్రజలే తగిన తీర్పు ఇస్తారని వ్యాఖ్యానించారు.
మంచిర్యాల ఎమ్మెల్యే ప్రజలకు ఇచ్చిన హామీలను నెరవేర్చాలని కోరిన కేటీఆర్, బీఆర్ఎస్ నాయకులు, కార్యకర్తలను వేధిస్తే సహించబోమని హెచ్చరించారు. ప్రభుత్వ ఉద్యోగులు, పోలీసులు రాజకీయాలకు అతీతంగా ప్రజల కోసం పనిచేయాలని సూచించారు.
రైతుల సమస్యలను ప్రభుత్వం పూర్తిగా నిర్లక్ష్యం చేసిందని ఆరోపించిన కేటీఆర్, పంటల కొనుగోళ్లలో జాప్యం కారణంగా రైతులు తీవ్రంగా నష్టపోతున్నారని అన్నారు. నలుగురు రైతులు ప్రాణాలు కోల్పోయినా ప్రభుత్వం స్పందించలేదని విమర్శించారు. రైతు కుటుంబాలకు న్యాయం చేయాలని బీఆర్ఎస్ ఎనిమిది గంటల పాటు ధర్నా నిర్వహించినప్పటికీ ప్రభుత్వం స్పందించలేదని పేర్కొన్నారు.
యూరియా పంపిణీలో యాప్ విధానం రైతులకు ఇబ్బందులు కలిగిస్తోందని, కాళేశ్వరం ప్రాజెక్టుపై ప్రభుత్వం అనవసర రాజకీయాలు చేస్తోందని కేటీఆర్ ఆరోపించారు. కాళేశ్వరం పంపులను నడిపితే ఎల్లంపల్లి వరకు నీటిని తరలించే అవకాశం ఉందని, రెండు పిల్లర్లు దెబ్బతిన్న కారణంగా మొత్తం ప్రాజెక్టును నిర్లక్ష్యం చేయడం సరికాదని అన్నారు. 36 నెలలు గడిచినా మరమ్మతులు ఎందుకు చేపట్టలేదని రైతులు ప్రశ్నిస్తున్నారని పేర్కొన్నారు.
తెలంగాణలో రైతులు, యువత మరోసారి ఏకమైతే కాంగ్రెస్ ప్రభుత్వానికి గట్టి సమాధానం చెబుతారని కేటీఆర్ అన్నారు. బీఆర్ఎస్ మళ్లీ అధికారంలోకి వచ్చి రైతు సంక్షేమానికి ప్రాధాన్యత ఇస్తుందని ఆయన విశ్వాసం వ్యక్తం చేశారు.
