కాంగ్రెస్ జాబ్ క్యాలెండర్, నిరుద్యోగ సమస్యలపై ప్రభుత్వాన్ని నిలదీసిన కేటీఆర్
KTR questions the government over the Congress job calendar and the issue of unemployment.
హైదరాబాద్, ఆగస్టు 3 (వాయిస్ టుడే):
కాంగ్రెస్ ప్రభుత్వం ఎన్నికల సమయంలో ఇచ్చిన ఉద్యోగ హామీలను అమలు చేయడంలో విఫలమైందని, విడుదల చేసిన జాబ్ క్యాలెండర్ కూడా అమలుకు నోచుకోలేదని బీఆర్ఎస్ వర్కింగ్ ప్రెసిడెంట్ కేటీఆర్ విమర్శించారు. తెలంగాణ భవన్లో సోమవారం నిర్వహించిన మీడియా సమావేశంలో ఆయన మాట్లాడుతూ, రాష్ట్రంలోని నిరుద్యోగ యువత తీవ్ర నిరాశలో ఉందని అన్నారు.
ఇంజనీరింగ్ విద్యార్థులు, ఇంజనీర్లపై ముఖ్యమంత్రి రేవంత్ రెడ్డి చేసిన వ్యాఖ్యలను తీవ్రంగా ఖండించిన కేటీఆర్, అలాంటి వ్యాఖ్యలు లక్షలాది మంది విద్యార్థుల మనోభావాలను దెబ్బతీస్తాయని అన్నారు. విదేశాల్లో పనిచేస్తున్న తెలంగాణ ఇంజనీర్లు, రాష్ట్ర అభివృద్ధిలో కీలక పాత్ర పోషించిన ఇంజనీర్లను అవమానించడం సరికాదని వ్యాఖ్యానించారు.
ఉద్యోగాల భర్తీ, నిరుద్యోగ భృతి, జాబ్ క్యాలెండర్ వంటి ఎన్నికల హామీలను కాంగ్రెస్ ప్రభుత్వం అమలు చేయలేదని ఆరోపించారు. నిరుద్యోగులు ఆత్మహత్యలకు పాల్పడవద్దని విజ్ఞప్తి చేస్తూ, వారి సమస్యలను అసెంబ్లీలో బీఆర్ఎస్ తరఫున లేవనెత్తుతామని తెలిపారు.
అలాగే బీసీ రిజర్వేషన్లు, గురుకులాల పరిస్థితి, ఐటీ ఉద్యోగాల తగ్గుదల, కాళేశ్వరం, సాగునీటి ప్రాజెక్టులు, మెట్రో, రాష్ట్ర అభివృద్ధి అంశాలపై కూడా కాంగ్రెస్ ప్రభుత్వంపై కేటీఆర్ విమర్శలు గుప్పించారు. ప్రభుత్వం తన ఎన్నికల హామీలను నెరవేర్చి, యువతకు ఉద్యోగ అవకాశాలు కల్పించాలని డిమాండ్ చేశారు.
ఈ సమావేశంలో మాజీ మంత్రులు జగదీష్ రెడ్డి, పువ్వాడ అజయ్ కుమార్, ఎమ్మెల్యే అనిల్ జాదవ్, ఎమ్మెల్సీ తాతా మధు, మాజీ ఎమ్మెల్యే జీవన్ రెడ్డి, మాజీ ఎమ్మెల్సీ నారదాసు లక్ష్మణరావు, బీఆర్ఎస్ జనరల్ సెక్రటరీ ఆర్.ఎస్. ప్రవీణ్ కుమార్ తదితరులు పాల్గొన్నారు.
