అమ్మవారి ఆశీస్సులతో తెలంగాణకు సమృద్ధి వర్షాలు.. బోనాలు ఘన విజయం: మంత్రి పొన్నం ప్రభాకర్
సికింద్రాబాద్, ఆగస్టు 3 (వాయిస్ టుడే):
Abundant rains for Telangana with the Goddess’s blessings… Bonalu a grand success: Minister Ponnam Prabhakar
సికింద్రాబాద్లోని శ్రీ ఉజ్జయిని మహంకాళి ఆలయంలో నిర్వహించిన ఆషాఢ బోనాల ఉత్సవాలు అత్యంత వైభవంగా, భక్తిశ్రద్ధలతో జరిగాయని రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ తెలిపారు. అమ్మవారి రంగం కార్యక్రమం అనంతరం మీడియాతో మాట్లాడిన ఆయన, రంగంలో అమ్మవారు ఈ ఏడాది తెలంగాణలో సమృద్ధిగా వర్షాలు కురుస్తాయని భవిష్యవాణి చేశారని పేర్కొన్నారు.
రాష్ట్రంలో సమృద్ధిగా వర్షాలు కురిసి పాడిపంటలు బాగా పండాలని, ప్రజలంతా ఆయురారోగ్యాలతో సుఖసంతోషాలతో జీవించాలని అమ్మవారిని ప్రార్థించినట్లు మంత్రి తెలిపారు.
తెలంగాణ సంస్కృతి, సంప్రదాయాలకు ప్రతీకగా నిలిచే ఆషాఢ బోనాల ఉత్సవాలను ప్రభుత్వం అత్యంత ప్రతిష్ఠాత్మకంగా నిర్వహించిందన్నారు. దేవాదాయ శాఖ, రెవెన్యూ, పోలీసు, జీహెచ్ఎంసీ, రవాణా తదితర అన్ని ప్రభుత్వ శాఖలు సమన్వయంతో పనిచేసి భక్తులకు అవసరమైన అన్ని సౌకర్యాలు కల్పించాయని చెప్పారు.
ప్రభుత్వం కల్పించిన ఉచిత బస్సు ప్రయాణం, మెరుగైన ఏర్పాట్ల కారణంగా గతంతో పోలిస్తే మూడింతలు అధిక సంఖ్యలో భక్తులు ఆలయానికి తరలివచ్చారని తెలిపారు. భారీ సంఖ్యలో భక్తులు రావడంతో కొంత అసౌకర్యం ఏర్పడినప్పటికీ సహకరించిన హైదరాబాద్ నగర ప్రజలకు మంత్రి ప్రత్యేక ధన్యవాదాలు తెలిపారు.
బోనాల ఉత్సవాలను విజయవంతంగా నిర్వహించడంలో రెవెన్యూ, పోలీసు, దేవాదాయ శాఖలతో పాటు అన్ని ప్రభుత్వ విభాగాలు సమన్వయంతో పనిచేశాయని మంత్రి కొనియాడారు.
ఆలయ దర్శనాల సందర్భంగా జోగినీలకు ప్రత్యేక గుర్తింపు కార్డులు ఇవ్వాలని వారు కోరిన విషయాన్ని ప్రభుత్వం పరిశీలిస్తోందన్నారు. జోగినీలకు మున్సిపల్ కార్పొరేషన్లలో సభ్యులుగా అవకాశం కల్పించేందుకు రాష్ట్ర కేబినెట్ ఇప్పటికే నిర్ణయం తీసుకుందని, వారికి ఉపాధి అవకాశాలు కూడా కల్పిస్తున్నామని తెలిపారు.
దేవాదాయ శాఖ కమిటీల్లో జోగినీలకు గుర్తింపు కల్పించే అంశాన్ని ప్రభుత్వం సానుకూలంగా పరిశీలిస్తోందని మంత్రి వెల్లడించారు.
అమ్మవారి విగ్రహ ప్రతిష్ఠాపనకు సంబంధించిన అంశంపై దేవాదాయ శాఖ ప్రిన్సిపల్ సెక్రటరీ, సంబంధిత అధికారులతో కమిటీ ఏర్పాటు చేసి నివేదిక సమర్పించిన అనంతరం ప్రభుత్వం తుది నిర్ణయం తీసుకుంటుందని మంత్రి పొన్నం ప్రభాకర్ స్పష్టం చేశారు.
