తెలంగాణ కీర్తిపతాక ఎగరేసిన ఐఏఎస్ కీర్తి జల్లి..

హైదరాబాద్, ఆగస్టు 6 (వాయిస్ టుడే): తెలంగాణకు చెందిన యువ ఐఏఎస్ అధికారిణి కీర్తి జల్లి మరో విశిష్ట గౌరవాన్ని అందుకున్నారు. అస్సాం–మేఘాలయ క్యాడర్‌కు చెందిన 2013 బ్యాచ్ ఐఏఎస్ అధికారిణి అయిన ఆమె, అమెరికా ప్రభుత్వం ప్రతిష్ఠాత్మకంగా నిర్వహించే హ్యూబర్ట్ హెచ్. హంఫ్రీ ఫెలోషిప్ ప్రోగ్రామ్కు ఎంపికయ్యారు. ఈ ఫెలోషిప్‌లో భాగంగా ఆమె 2026 ఆగస్టు నుంచి అమెరికాలోని ప్రపంచ ప్రఖ్యాత మసాచుసెట్స్ ఇన్‌స్టిట్యూట్ ఆఫ్ టెక్నాలజీ (MIT), కేంబ్రిడ్జ్లో టెక్నాలజీ పాలసీ అండ్ మేనేజ్‌మెంట్ విభాగంలో పదినెలలపాటు ఉన్నత స్థాయి వృత్తిపరమైన అధ్యయనం చేయనున్నారు. ఈ ఎంపికతో తెలంగాణకు అంతర్జాతీయ స్థాయిలో మరోసారి గౌరవం దక్కింది.

ఉమ్మడి వరంగల్ జిల్లా తరిగొప్పుల గ్రామానికి చెందిన కీర్తి జల్లి సాధారణ వ్యవసాయ కుటుంబంలో జన్మించారు. ఆమె విద్యాభ్యాసం హైదరాబాద్‌లో సాగింది. చిన్ననాటి నుంచే ప్రతిభ కనబరిచిన ఆమె కంప్యూటర్ సైన్స్ అండ్ ఇంజినీరింగ్‌లో బీటెక్ పూర్తి చేసి, అత్యంత ప్రతిష్ఠాత్మకమైన భారత పరిపాలనా సేవ (IAS)లో స్థానం సంపాదించారు. ఆమె తండ్రి తెలంగాణ హైకోర్టులో సీనియర్ అడ్వకేట్‌గా సేవలందిస్తుండగా, తల్లి గృహిణి. కుటుంబ విలువలు, క్రమశిక్షణ, కృషి, సమాజ సేవ పట్ల ఉన్న నిబద్ధతే ఆమెను ఉన్నత శిఖరాలకు చేర్చాయని సన్నిహితులు పేర్కొంటున్నారు.

2013 బ్యాచ్ ఐఏఎస్ అధికారిణిగా అస్సాం–మేఘాలయ క్యాడర్‌లో చేరిన కీర్తి జల్లి గత దశాబ్దానికి పైగా వివిధ కీలక బాధ్యతలను సమర్థంగా నిర్వహించారు. ప్రస్తుతం ఆమె అస్సాం ప్రభుత్వ పంచాయతీ మరియు గ్రామీణాభివృద్ధి కమిషనర్, అలాగే స్వచ్ఛ భారత్ మిషన్ (గ్రామీణ) మిషన్ డైరెక్టర్గా విధులు నిర్వహిస్తున్నారు. జిల్లా కమిషనర్‌గా పనిచేసిన సమయంలో మాతా–శిశు ఆరోగ్య సేవల మెరుగుదల, పోషకాహార కార్యక్రమాలు, రక్తహీనత నివారణ, మహిళా సాధికారత, పౌర సేవల విస్తరణ, గ్రామీణ అభివృద్ధి, విద్య, సామాజిక సంక్షేమ రంగాల్లో అనేక వినూత్న కార్యక్రమాలను విజయవంతంగా అమలు చేశారు.

అస్సాంలో తరచుగా సంభవించే వరదల సమయంలో సహాయక చర్యలను సమర్థంగా సమన్వయం చేయడంతో పాటు, కోవిడ్-19 మహమ్మారి సమయంలో ప్రజలకు అవసరమైన వైద్య సేవలు, ఆహార సరఫరా, అత్యవసర సేవలను సమర్థవంతంగా అందించేలా పరిపాలనను ముందుండి నడిపించారు. ప్రజా పరిపాలనలో ఆమె చూపిన ప్రతిభకు గుర్తింపుగా అస్సాం ప్రభుత్వం “చీఫ్ మినిస్టర్ కర్మశ్రీ అవార్డు ఫర్ ఎక్సలెన్స్ ఇన్ పబ్లిక్ అడ్మినిస్ట్రేషన్”తో సత్కరించింది.

ప్రస్తుతం ఆమె నాయకత్వంలో అస్సాంలో గ్రామీణాభివృద్ధి, పారిశుద్ధ్యం, పంచాయతీరాజ్ సంస్థల బలోపేతం, గ్రామీణ జీవనోపాధి మెరుగుదల, వాతావరణ మార్పులకు అనుగుణంగా గ్రామాల అభివృద్ధి, డిజిటల్ సేవల విస్తరణ వంటి అనేక కీలక కార్యక్రమాలు కొనసాగుతున్నాయి. ప్రభుత్వ సేవలను గ్రామీణ ప్రజలకు మరింత సులభంగా అందించడంలో సాంకేతికత వినియోగంపై ఆమె ప్రత్యేక దృష్టి సారించారు.

హంఫ్రీ ఫెలోషిప్ సందర్భంగా ఎంఐటీలో ఆమె టెక్నాలజీ పాలసీ, డిజిటల్ పబ్లిక్ ఇన్‌ఫ్రాస్ట్రక్చర్, కృత్రిమ మేధ (AI) ఆధారిత పాలన, డేటా ఆధారిత నిర్ణయాలు, ఈ-గవర్నెన్స్, ప్రజా విధానాల రూపకల్పన వంటి అంశాలపై అధ్యయనం చేయనున్నారు. ఈ అనుభవం భారతదేశంలో ప్రజా సేవల సామర్థ్యాన్ని మరింత పెంచేందుకు ఉపయోగపడుతుందని నిపుణులు భావిస్తున్నారు. హంఫ్రీ ఫెలోషిప్ ప్రత్యేకత హ్యూబర్ట్ హెచ్. హంఫ్రీ ఫెలోషిప్ ప్రపంచవ్యాప్తంగా ప్రజాపాలన, విధాన రూపకల్పన, నాయకత్వం, అభివృద్ధి రంగాల్లో విశేష ప్రతిభ కనబరిచిన ప్రభుత్వ అధికారులు, విధాన రూపకర్తలు, నిపుణులకు అమెరికా ప్రభుత్వం అందించే అత్యంత ప్రతిష్ఠాత్మక అంతర్జాతీయ ఫెలోషిప్. ఇందులో ఎంపికైన ఫెలోలకు ప్రపంచంలోని ప్రముఖ విశ్వవిద్యాలయాల్లో అధ్యయనం చేయడంతో పాటు, అంతర్జాతీయ నిపుణులతో కలిసి పనిచేసే అవకాశం లభిస్తుంది.

కీర్తి జల్లి ఎంపిక తెలంగాణ యువతకు కొత్త స్ఫూర్తిని అందిస్తోంది. గ్రామీణ నేపథ్యం నుంచి ప్రపంచ ప్రఖ్యాత విద్యాసంస్థ ఎంఐటీలో అడుగుపెడుతున్న ఆమె విజయం కృషి, పట్టుదల, నిజాయితీ, ప్రజాసేవ పట్ల అంకితభావానికి నిదర్శనంగా నిలుస్తోంది.