బీసీ సీఎం కావడానికి ఇంకా సమయం ఉంది

భవిష్యత్తులో కాంగ్రెస్ నుంచే బీసీ నేత ముఖ్యమంత్రి అవుతారు: మహేశ్ కుమార్ గౌడ్

A BC leader from the Congress party will become Chief Minister in the future: Mahesh Kumar Goud

హైదరాబాద్, అక్టోబర్ 21 (వాయిస్ టుడే):

తెలంగాణలో బీసీ వర్గానికి చెందిన నాయకుడు ముఖ్యమంత్రి కావడానికి ఎలాంటి గడువు లేదని, అందుకు ఇంకా సమయం ఉందని టీపీసీసీ అధ్యక్షుడు మహేశ్ కుమార్ గౌడ్ స్పష్టం చేశారు. భవిష్యత్తులో ఏదో ఒక రోజు కాంగ్రెస్ పార్టీ ద్వారానే బీసీ నాయకుడు ముఖ్యమంత్రి అవుతారని ఆయన ధీమా వ్యక్తం చేశారు. బీసీ సీఎం నినాదం కాంగ్రెస్ అగ్రనేత రాహుల్ గాంధీ ఆలోచన అని పేర్కొన్నారు.

ముఖ్యమంత్రి రేవంత్ రెడ్డి పాలన, సంక్షేమ పథకాల అమలు పట్ల మహేశ్ కుమార్ గౌడ్ ప్రశంసలు కురిపించారు. రాష్ట్రంలో కాంగ్రెస్ ప్రభుత్వం అమలు చేస్తున్న అభివృద్ధి, సంక్షేమ కార్యక్రమాల ఫలితంగా 2034 వరకే కాకుండా 2039 వరకు కూడా అధికారంలో కొనసాగే అవకాశం ఉందని విశ్వాసం వ్యక్తం చేశారు. పార్టీ కార్యకర్తల్లో ఆత్మవిశ్వాసం నింపేందుకే రేవంత్ రెడ్డి 2034 వరకు తానే ముఖ్యమంత్రిగా ఉంటానని ప్రకటించారని, అందులో తప్పేమీ లేదని సమర్థించారు.

వచ్చే ఎన్నికల తర్వాత కూడా రేవంత్ రెడ్డి ముఖ్యమంత్రిగా కొనసాగినా తమకు ఎలాంటి అభ్యంతరం లేదని, బీసీ నాయకుడికి ముఖ్యమంత్రి అయ్యే అవకాశం భవిష్యత్తులో తప్పకుండా వస్తుందని ఆయన అభిప్రాయపడ్డారు. కాంగ్రెస్ పార్టీలో ఎప్పుడు ఎలాంటి రాజకీయ పరిణామాలు చోటుచేసుకుంటాయో ఎవరూ ముందుగా అంచనా వేయలేరని వ్యాఖ్యానించారు.

ఇదే సమయంలో బీఆర్ఎస్ పార్టీ బీసీ నాయకుడిని ముఖ్యమంత్రిని చేయగలదా? అని ప్రశ్నించారు. కాంగ్రెస్ ప్రభుత్వం కార్పొరేషన్ పదవులు, స్థానిక సంస్థల ఎన్నికల్లో ఎస్సీ, ఎస్టీ, బీసీ వర్గాలకు ప్రాధాన్యత కల్పిస్తోందని గుర్తుచేశారు. కొండా సురేఖ వ్యవహారంలో ఆమె కుమార్తె సుస్మిత తొందరపడి వ్యవహరించారని అభిప్రాయపడ్డారు.

రాష్ట్రంలో కాంగ్రెస్ పార్టీ క్షేత్రస్థాయిలో బలంగా ఉందని, బీజేపీకి తెలంగాణలో రాజకీయ భవిష్యత్తు లేదని మహేశ్ కుమార్ గౌడ్ పేర్కొన్నారు. బీసీ నాయకత్వానికి భవిష్యత్తులో ప్రాధాన్యత ఉంటుందని ఆయన వ్యాఖ్యలు చేయడం రాష్ట్ర రాజకీయాల్లో చర్చనీయాంశంగా మారింది.