రెడ్‌క్రాస్‌ ఎన్నికల్లో రెండో స్థానం సాధించిన కోల అన్నారెడ్డికి ఘన సన్మానం
Grand felicitation for Kola Annareddy, who secured second place in the Red Cross elections
1,961 ఓట్లతో సత్తాచాటిన ఇంజనీర్‌.. శ్రీపురం వాకర్స్‌ క్లబ్‌ ఆధ్వర్యంలో అభినందన సభ
కరీంనగర్‌: ఇండియన్‌ రెడ్‌క్రాస్‌ సొసైటీ కరీంనగర్‌ జిల్లా కార్యవర్గానికి ఇటీవల జరిగిన ఎన్నికల్లో ఇంజనీర్‌ కోల అన్నారెడ్డి విశేష ప్రజాదరణను చాటుకున్నారు. మొత్తం 17 మంది అభ్యర్థులు పోటీపడిన ఈ ఎన్నికల్లో ఆయన 1,961 ఓట్లు సాధించి రెండో స్థానాన్ని కైవసం చేసుకున్నారు. ఈ విజయాన్ని పురస్కరించుకొని శ్రీపురం వాకర్స్‌ క్లబ్‌ ఆధ్వర్యంలో ఆయనకు ఘనంగా సన్మాన కార్యక్రమం నిర్వహించారు.
ఈ సందర్భంగా క్లబ్‌ సభ్యులు, ప్రముఖులు కోల అన్నారెడ్డిని శాలువాతో సత్కరించి అభినందనలు తెలిపారు. రెడ్‌క్రాస్‌ సొసైటీ ఎన్నికల్లో ఆయన సాధించిన విజయాన్ని ప్రశంసించారు. సమాజ సేవ పట్ల ఆయనకున్న నిబద్ధత, సేవాభావం, ప్రజలకు అందుబాటులో ఉంటూ సామాజిక కార్యక్రమాల్లో చురుకుగా పాల్గొనే లక్షణాలే ఈ స్థాయి ప్రజాదరణకు కారణమని పలువురు అభిప్రాయపడ్డారు.
ఈ సందర్భంగా డాక్టర్‌ బంక మల్లేష్‌ మాట్లాడుతూ, సమాజ సేవను లక్ష్యంగా చేసుకొని ముందుకు సాగుతున్న ఇంజనీర్‌ కోల అన్నారెడ్డి ఎన్నికల్లో గణనీయమైన ఓట్లు సాధించడం అభినందనీయమన్నారు. 17 మంది అభ్యర్థుల్లో రెండో స్థానం సాధించడం ఆయనపై ప్రజలకు ఉన్న నమ్మకానికి నిదర్శనమని పేర్కొన్నారు. రెడ్‌క్రాస్‌ సొసైటీ వంటి సేవా సంస్థల ద్వారా ప్రజలకు మరింత మెరుగైన సేవలు అందించే అవకాశం ఆయనకు లభించిందని అన్నారు.
ప్రజాసేవలో మరింత ముందుకు సాగుతూ పేదలు, అవసరంలో ఉన్నవారికి అండగా నిలవాలని ఆకాంక్షించారు. భవిష్యత్తులో మరిన్ని సేవా కార్యక్రమాలు చేపట్టి ప్రజల ఆదరాభిమానాలను పొందుతూ ఉన్నత శిఖరాలను అధిరోహించాలని డాక్టర్‌ బంక మల్లేష్‌ ఆకాంక్షించారు.
అనంతరం కోల అన్నారెడ్డిని పలువురు అభినందించి శుభాకాంక్షలు తెలిపారు. కార్యక్రమంలో బంక శ్రీలక్ష్మి, చీపిరిశెట్టి సత్యనారాయణ, నల్ల రాజయ్య సతీష్‌, పిస్క లక్ష్మీనారాయణ, పిట్టల శ్రీనివాస్‌, చావ నాగేశ్వరరావు, మద్ది నారాయణ తదితరులు పాల్గొన్నారు.
