హరీష్ రావు వ్యాఖ్యలు రాజకీయ దివాళాకోరుతనానికి నిదర్శనం: సేవాదళ్ అధ్యక్షుడు మిద్దెల జితేందర్
Harish Rao’s comments are a sign of political bankruptcy: Seva Dal President Middela Jitender.
హైదరాబాద్: మాజీ మంత్రి హరీష్ రావు ముఖ్యమంత్రి రేవంత్ రెడ్డిపై చేసిన వ్యాఖ్యలు పూర్తిగా నిరాధారమైనవి, బాధ్యతారాహిత్యమైనవి, రాజకీయ సంస్కృతిని దిగజార్చేవని తెలంగాణ ప్రదేశ్ కాంగ్రెస్ సేవాదళ్ అధ్యక్షుడు మిద్దెల జితేందర్ తీవ్రంగా విమర్శించారు.
ఆధారాలు లేకుండా ప్రజాస్వామ్యబద్ధంగా ఎన్నికైన ముఖ్యమంత్రిపై తీవ్ర ఆరోపణలు చేయడం, నేరస్థులతో పోల్చేలా మాట్లాడటం అత్యంత ఖండనీయమని ఆయన పేర్కొన్నారు. రాజకీయ విభేదాలు సహజమే అయినప్పటికీ వ్యక్తిత్వ హననం ప్రజాస్వామ్య విలువలకు విరుద్ధమని అన్నారు.
హరీష్ రావు ముందుగా తమ పార్టీ పాలనలో చేసిన హామీలపై ప్రజలకు సమాధానం చెప్పాలని జితేందర్ డిమాండ్ చేశారు. తెలంగాణ ప్రజలు ఇచ్చిన తీర్పును గౌరవించకుండా ప్రతిరోజూ నిరాధార ఆరోపణలు చేయడం ద్వారా రాజకీయ లబ్ధి పొందాలని ప్రయత్నిస్తున్నారని విమర్శించారు.
రేవంత్ రెడ్డి నాయకత్వంలోని కాంగ్రెస్ ప్రభుత్వం అధికారంలోకి వచ్చిన తర్వాత ప్రజలకు ఇచ్చిన హామీల అమలుపై చిత్తశుద్ధితో పనిచేస్తోందని ఆయన పేర్కొన్నారు. రైతు భరోసా పథకం కింద తొమ్మిది రోజుల్లోనే రూ.9,000 కోట్లకు పైగా రైతుల ఖాతాల్లో జమ చేయడం రైతుల పట్ల ప్రభుత్వ నిబద్ధతకు నిదర్శనమని అన్నారు.
ప్రభుత్వం అమలు చేస్తున్న ముఖ్య సంక్షేమ కార్యక్రమాలను ఆయన ప్రస్తావిస్తూ, రైతు భరోసా, రూ.500కే గ్యాస్ సిలిండర్, మహిళలకు ఉచిత ఆర్టీసీ బస్సు ప్రయాణం, 200 యూనిట్ల వరకు ఉచిత విద్యుత్, ఇందిరమ్మ ఇళ్ల నిర్మాణం, యువతకు ఉద్యోగాల భర్తీ, సాగునీరు–తాగునీటి సదుపాయాల విస్తరణ, విద్య–వైద్యం–మౌలిక వసతుల అభివృద్ధికి భారీ నిధుల కేటాయింపు, సామాజిక న్యాయం, పారదర్శక పాలన వంటి అంశాల్లో ప్రభుత్వం కట్టుబడి పనిచేస్తోందని తెలిపారు.
ఈ ప్రజా సంక్షేమ కార్యక్రమాలను రాజకీయంగా తట్టుకోలేక ప్రతిపక్ష నాయకులు అసత్య ప్రచారాలకు దిగుతున్నారని ఆరోపించారు. ప్రజలకు ఉపయోగపడే అంశాలపై చర్చించకుండా వ్యక్తిగత ఆరోపణలతో కాలక్షేపం చేయడం బీఆర్ఎస్ నాయకుల రాజకీయ దివాళాకోరుతనాన్ని మాత్రమే బయటపెడుతోందని వ్యాఖ్యానించారు.
నిజంగా ఏవైనా ఆధారాలు ఉంటే వాటిని చట్టబద్ధమైన సంస్థల ముందు సమర్పించాలని, మీడియా వేదికగా సంచలన వ్యాఖ్యలు చేసి ప్రజలను తప్పుదారి పట్టించే ప్రయత్నాలు మానుకోవాలని సూచించారు.
హరీష్ రావు తన నిరాధార వ్యాఖ్యలను వెంటనే వెనక్కి తీసుకుని, ముఖ్యమంత్రి రేవంత్ రెడ్డికి, తెలంగాణ ప్రజలకు బహిరంగ క్షమాపణ చెప్పాలని తెలంగాణ ప్రదేశ్ కాంగ్రెస్ సేవాదళ్ డిమాండ్ చేసింది. తెలంగాణ ప్రజలు అసత్య ప్రచారాన్ని కాకుండా అభివృద్ధి, సంక్షేమం, పారదర్శక పాలనను విశ్వసిస్తారని మిద్దెల జితేందర్ స్పష్టం చేశారు.
