పాత పేరు – కొత్త అజెండా
హైదరాబాద్, ఏప్రిల్ 6, (వాయిస్ టుడే )
Old Name – New Agenda
తెలంగాణ రాజకీయ యవనికపై మరో కీలక మలుపునకు రంగం సిద్ధమవుతోంది. భారత రాష్ట్ర సమితి అగ్రనాయకత్వానికి ఊహించని షాక్ ఇస్తూ, కేసీఆర్ కుమార్తె కల్వకుంట్ల కవిత తన సొంత రాజకీయ అజెండాను
సిద్ధం చేసుకుంటున్నారు. తాజాగా ఆమె మీడియా సమావేశంలో చేసిన వ్యాఖ్యలు రాష్ట్ర రాజకీయాల్లో ప్రకంపనలు సృష్టిస్తున్నాయి. ముఖ్యంగా తెలంగాణ సెంటిమెంట్కు మారుపేరైన ‘టీఆర్ఎస్’ పేరును ఆమె
ప్రస్తావించడం, బీఆర్ఎస్ ఉనికికే సవాలుగా మారేలా కనిపిస్తోంది. పరోక్షంగా తన భవిష్యత్తు రాజకీయ కార్యాచరణపై స్పష్టతనిచ్చారు. ప్రైవేట్ విద్యా సంస్థల ఫీజుల దోపిడీపై చర్చించేందుకు పిలిచిన ఈ సమావేశంలో
రాజకీయ ప్రశ్నలు ఎదురైనప్పుడు ఆమె ఆసక్తికర వ్యాఖ్యలు చేశారు. “ప్రస్తుతం టీఆర్ఎస్ పేరు ఫ్రీగా ఉంది.. దాన్ని ఎవరైనా వాడుకోవచ్చు” అని ఆమె అనడం వెనుక లోతైన వ్యూహం ఉందని విశ్లేషకులు
భావిస్తున్నారు. తన పార్టీ ప్రొఫెసర్ జయశంకర్ సిద్ధాంతాల మేరకే నడుస్తుందని, తమకు ఇతర రాష్ట్రాల సిద్ధాంతకర్తలు అవసరం లేదని స్పష్టం చేయడం ద్వారా ఆమె నేరుగా బీఆర్ఎస్ ప్రస్తుత పోకడలపై విమర్శలు
గుప్పించారు.2001 ఏప్రిల్ 27న జలదృశ్యంలో కేసీఆర్ స్థాపించిన తెలంగాణ రాష్ట్ర సమితి , రెండు దశాబ్దాల పోరాటం తర్వాత రాష్ట్రాన్ని సాధించి పెట్టింది. అయితే, 2022 అక్టోబర్ 5న జాతీయ రాజకీయాల
కాంక్షతో కేసీఆర్ ఈ పేరును భారత రాష్ట్ర సమితి మార్చారు. ఈ నిర్ణయం చారిత్రక తప్పిదమని, దీనివల్ల తెలంగాణ అస్తిత్వంతో ఉన్న పేగుబంధం తెగిపోయిందని ఇప్పుడు పార్టీ శ్రేణులే భావిస్తున్నాయి.2023 అసెంబ్లీ
ఎన్నికల్లో 39 సీట్లకే పరిమితం కావడం, 2024 లోక్సభ ఎన్నికల్లో ఒక్క సీటు కూడా గెలవకపోవడంతో బీఆర్ఎస్ తీవ్ర నైరాశ్యంలో ఉంది. సరిగ్గా ఈ సమయంలో కవిత మళ్లీ పాత పేరును తలకెత్తుకోవడం ద్వారా
తెలంగాణ వాదులను, అసంతృప్త నేతలను తనవైపు తిప్పుకునే ప్రయత్నం చేస్తున్నారు.కవిత తన మాటల్లో మరో కీలక అంశాన్ని ప్రస్తావించారు. తమ పార్టీలో బిహార్ సిద్ధాంతకర్తలు ఉండరని చెప్పడం ద్వారా బీఆర్ఎస్
నియమించుకున్న పొలిటికల్ స్ట్రాటజిస్టుల పెత్తనాన్ని ఆమె ఎండగట్టారు. ఇది నేరుగా కేటీఆర్ అనుసరిస్తున్న కార్పొరేట్ తరహా రాజకీయాలపై ఆమె చేసిన దాడిగా కనిపిస్తోంది. బీఆర్ఎస్ ప్రస్తుతం నిద్రావస్థలో ఉందని,
తెలంగాణ ప్రయోజనాల కోసం పోరాడే శక్తి దానికి లేదని ఆమె చేసిన వ్యాఖ్యలు పార్టీలో అంతర్గత పోరును బహిర్గతం చేస్తున్నాయి.కవిత తన కొత్త పార్టీ పేరును, అజెండాను ఈ నెలాఖరున ప్రకటించే అవకాశం ఉంది.
ఒకవేళ ఆమె నిజంగానే టీఆర్ఎస్ పేరుతో ముందుకు వస్తే బీఆర్ఎస్ నాయకత్వం ఎలా స్పందిస్తుందనేది ఆసక్తికరం. తెలంగాణ ప్రజల గుండెల్లో టీఆర్ఎస్ అనే పేరుకు ఉన్న క్రేజ్ కవితకు ప్లస్ అయ్యే అవకాశం ఉంది.
పాత ఉద్యమకారులు, క్షేత్రస్థాయి కార్యకర్తలు కవిత వైపు మొగ్గు చూపితే బీఆర్ఎస్ కు ఇబ్బందులు తలెత్తవచ్చు. కవితను అడ్డుకునేందుకు బీఆర్ఎస్ చట్టపరమైన లేదా రాజకీయపరమైన ప్రయత్నాలు చేస్తే, అది
ఆమెకు మరింత పబ్లిసిటీని తెచ్చిపెడుతుంది.తండ్రి వదులుకున్న అస్త్రమే ఇప్పుడు తనయకు ఆయుధంగా మారింది. పాత పేరు – కొత్త అజెండాతో కవిత చేస్తున్న ఈ ప్రయోగం తెలంగాణ రాజకీయ చిత్రపటాన్ని ఏ
విధంగా మారుస్తుందో చూడాలి. ఒకవేళ కవిత టీఆర్ఎస్ ను మళ్లీ బతికించగలిగితే, కేసీఆర్ వారసత్వాన్ని తానే కొనసాగిస్తున్నానని ఆమె క్లెయిమ్ చేసుకునే అవకాశం కలుగుతుంది.
