తెలంగాణ జడ్పీటీసీ, ఎంపీటీసీ ఎన్నికలు
మే నెలలో పోలింగ్
హైదరాబాద్, ఏప్రిల్ 20, ( వాయిస్ టుడే)
Telangana ZPTC and MPTC Elections
Polling in May
తెలంగాణలో ఎంపీటీసీ, జడ్పీటీసీ ఎన్నికల నగారా మోగడానికి సమయం ఆసన్నమైంది. గత కొంతకాలంగా ప్రత్యేకాధికారుల పాలనలో ఉన్న మండల, జిల్లా పరిషత్లకు తిరిగి ప్రజాప్రతినిధులను
ఎన్నుకునేందుకు రాష్ట్ర ఎన్నికల సంఘం వేగంగా అడుగులు వేస్తోంది. పరిస్థితులు అనుకూలిస్తే మే నెలలోనే ఎన్నికలు నిర్వహించేలా ప్రణాళికలు సిద్ధమవుతున్నాయి.
ఎన్నికల నిర్వహణలో అత్యంత కీలకమైన ఓటర్ల జాబితా తయారీకి ఎస్ఈసీ ఆదేశాలు జారీ చేసింది.
కొత్త ఓటర్ల చేరిక: 10.07.2025 నుండి 05.02.2026 వరకు కేంద్ర ఎన్నికల సంఘం నవీకరించిన జాబితా ఆధారంగా అదనపు ఓటర్లను గుర్తించనున్నారు.
గడువు: ఓటర్ల డేటాలో ఏవైనా వ్యత్యాసాలు ఉంటే ఈ నెల 23వ తేదీలోపు నివేదించాలని హైదరాబాద్, మేడ్చల్ మినహా మిగిలిన అన్ని జిల్లాల కలెక్టర్లను ఆదేశించారు.
తుది జాబితా: ముసాయిదా జాబితాపై అభ్యంతరాలు స్వీకరించిన తర్వాత తుది జాబితాను విడుదల చేసి, పోలింగ్ కేంద్రాలను ఖరారు చేస్తారు.
అదనపు ఓటర్ల వివరాలను మండలాల వారీగా గుర్తించి, వాటిని సంబంధిత పంచాయతీ, పోలింగ్ కేంద్రాల వారీగా ఉన్న జాబితాలకు జత చేయాలి. ఈ మేరకు అధికారులకు ఆదేశాలు వెళ్లాయి. వీటి
ఆధారంగానే ఎంపీటీసీ, జడ్పీటీసీల పరిధిలోని గ్రామపంచాయతీలు, పోలింగ్ స్టేషన్ల వారీగా కొత్త జాబితాలు రూపొందిస్తారు. ఈ లిస్టులను జిల్లా పంచాయతీ అధికారి కన్ఫామ్ చేసిన తర్వాత.. సెంటర్ ఫర్ గుడ్
గవర్నెన్స్ యూజర్ మాన్యువల్ సూచనల ప్రకారం.. పోలింగ్ కేంద్రాలకు అనుసంధానిస్తారు.ఈ ఎన్నికలు కేవలం స్థానిక ప్రతినిధులను ఎన్నుకునే ప్రక్రియ మాత్రమే కాదు, రాష్ట్రంలోని ప్రధాన పార్టీలకు ఇదొక
అగ్నిపరీక్ష. రాష్ట్రంలో అధికారంలో ఉన్న కాంగ్రెస్ పార్టీ, తన సంక్షేమ పథకాలు, పాలనపై ప్రజల తీర్పును ఈ ఎన్నికల ద్వారా నిరూపించుకోవాలని చూస్తోంది. స్థానిక సంస్థలపై పట్టు సాధిస్తేనే క్షేత్రస్థాయిలో
పార్టీ క్యాడర్ బలోపేతం అవుతుందని భావిస్తోంది. అసెంబ్లీ ఎన్నికల తర్వాత కొంత డీలా పడ్డ బీఆర్ఎస్, తన కంచుకోటలైన గ్రామీణ ప్రాంతాల్లో తిరిగి పట్టు సాధించేందుకు ఈ ఎన్నికలను ఒక అవకాశంగా
మలుచుకోవాలని చూస్తోంది. ముఖ్యంగా బీసీ రిజర్వేషన్ల అంశంపై హైకోర్టు తీర్పు తర్వాత ఏర్పడిన పరిస్థితులను తమకు అనుకూలంగా మార్చుకునే వ్యూహంలో ఉంది. పట్టణ ప్రాంతాలకే పరిమితం
కాకుండా, గ్రామీణ తెలంగాణలో కూడా పాగా వేయాలని చూస్తున్న బీజేపీకి ఈ ఎంపీటీసీ, జడ్పీటీసీ ఎన్నికలు అత్యంత కీలకం.
2019 మే నెలలో జరిగిన ఎన్నికల తర్వాత ఐదేళ్ల పదవీకాలం ముగిసినా, రిజర్వేషన్ల అంశంపై హైకోర్టులో పిటిషన్లు దాఖలు కావడంతో గతేడాది సెప్టెంబరులో జరగాల్సిన ఎన్నికల ప్రక్రియ నిలిచిపోయింది.
తాజాగా హైకోర్టు అనుమతితో, మే నెలలో ఎన్నికల నిర్వహణకు ప్రభుత్వం మొగ్గు చూపుతోంది. దీంతో వేసవి ఎండలతో పాటు తెలంగాణ పల్లెల్లో రాజకీయ సెగలు మొదలయ్యాయి. బ్యాలెట్ బాక్సుల సిద్ధం
చేయడం నుండి పార్టీల వ్యూహాల వరకు అంతా “మే” సమరానికి సిద్ధమవుతోంది. క్షేత్రస్థాయిలో ఏ పార్టీ జెండా ఎగురుతుందో చూడాలి!
మారిన స్థానిక లెక్కలు
గ్రామ పంచాయతీలు మున్సిపాలిటీల్లో విలీనం కావడం వల్ల ఈసారి ఎంపీటీసీ, జడ్పీటీసీ స్థానాల సంఖ్యలో మార్పులు చోటు చేసుకున్నాయి.
మొత్తం జడ్పీటీసీలు: 566 (4 స్థానాలు తగ్గాయి)
మొత్తం ఎంపీటీసీలు: 5,773 (44 స్థానాలు తగ్గాయి)
మొత్తం జిల్లా పరిషత్లు: 31 (మేడ్చల్-మల్కాజిగిరిని అర్బన్ జిల్లాగా మార్చడంతో జాబితా నుండి తొలగించారు).
ఎంపీటీసీ, జడ్పీటీసీలకు చివరిసారిగా 2019 మే 6, 10, 14వ తేదీల్లో ఎన్నికలు జరిగాయి. జూన్లో ఎంపీపీ, జడ్పీ ఛైర్పర్సన్లను ఎన్నుకున్నారు. కిందటి ఏడాది జూన్తో పదవీకాలం
ముగియడంతో ప్రత్యేకాధికారుల పాలన నడుస్తున్న విషయం తెలిసిందే.ఇప్పటికే ఎంపీటీసీ, జడ్పీటీసీ ఎన్నిక ప్రక్రియ పూర్తి కావాల్సి ఉంది. ఇందుకోసం గత సెప్టెంబర్ 29న నోటిఫికేషన్ ఇచ్చారు. కానీ బీసీ
రిజర్వేషన్ల విషయంపై ఎలక్షన్లు ఆగిపోయాయి. గత సెప్టెంబర్లోనే ఎన్నికల ప్రక్రియ మొదలైనప్పటికీ, బీసీ రిజర్వేషన్లపై పిటిషన్ కారణంగా అక్టోబర్లో హైకోర్టు స్టే ఇచ్చింది. అయితే ఇప్పుడు రిజర్వేషన్ల
విధానంపై స్పష్టత రావడంతో కోర్టు అనుమతితో మే నెలలో ఎన్నికలు జరపాలని ప్రభుత్వం భావిస్తోంది. ఇప్పటికే పంచాయతీరాజ్ శాఖ స్థానాల వారీగా జాబితాను సిద్ధం చేసి ఎన్నికల సంఘానికి
అందజేసింది.
