సూపర్ ఎల్ నినోపై రైతులకు అవగాహన కల్పించాలి: ఉప ముఖ్యమంత్రి పవన్ కళ్యాణ్

Farmers must be made aware of the Super El Niño: Deputy Chief Minister Pawan Kalyan

మంగళగిరి, జూలై 30: రాష్ట్రంలో సూపర్ ఎల్ నినో ప్రభావంతో ఏర్పడుతున్న సాగునీటి సంక్షోభంపై రైతులకు విస్తృత అవగాహన కల్పించాలని రాష్ట్ర ఉప ముఖ్యమంత్రి పవన్ కళ్యాణ్ జలవనరుల శాఖ మంత్రి నిమ్మల రామానాయుడుకు సూచించారు. రైతులతో ప్రత్యక్ష సమావేశాలు నిర్వహించి ప్రస్తుత పరిస్థితులను వివరించడంతో పాటు, సంక్షోభాన్ని ఎదుర్కొనే ప్రత్యామ్నాయ మార్గాలపై దృష్టి సారించాలని ఆదేశించారు.

గురువారం మంగళగిరిలోని క్యాంపు కార్యాలయంలో ఉప ముఖ్యమంత్రిని మంత్రి నిమ్మల రామానాయుడు కలిసి రాష్ట్రంలోని సాగునీటి పరిస్థితులు, సూపర్ ఎల్ నినో ప్రభావంపై చర్చించారు. ఈ సందర్భంగా కాకినాడ జిల్లా పిఠాపురం, పెద్దాపురం, జగ్గంపేట ప్రాంతాల రైతుల అవసరాల దృష్ట్యా ఏలేరు ప్రాజెక్టు నుంచి 1,000 క్యూసెక్కుల నీటిని విడుదల చేసినందుకు పవన్ కళ్యాణ్ మంత్రికి కృతజ్ఞతలు తెలిపారు.

ఏలేరు ఆయకట్టు ప్రాంతాల్లో నెలకొన్న పరిస్థితులను పరిశీలించేందుకు త్వరలో క్షేత్రస్థాయి పర్యటన చేపట్టనున్నట్లు మంత్రి నిమ్మల రామానాయుడు తెలిపారు.

రైతులకు అవగాహన కార్యక్రమాలు

క్షేత్రస్థాయి పర్యటనల్లో సూపర్ ఎల్ నినో ప్రభావం, నీటి కొరత కారణాలు, ప్రభుత్వం తీసుకుంటున్న చర్యలపై రైతులకు స్పష్టమైన అవగాహన కల్పించాలని ఉప ముఖ్యమంత్రి సూచించారు. ప్రకృతి విపత్తుల వల్ల రైతులు నష్టపోకుండా ప్రతి రైతు ప్రధాన మంత్రి ఫసల్ బీమా యోజన కింద పంటల బీమా చేయించుకునేలా ప్రత్యేక ప్రచార కార్యక్రమాలు నిర్వహించాలని పేర్కొన్నారు.

అవకాశం ఉన్న చోట రైతులతో ప్రత్యక్ష సమావేశాలు నిర్వహించి, ప్రస్తుత వాతావరణ పరిస్థితులు, వాటి ప్రభావం, ప్రభుత్వం చేపడుతున్న చర్యలను వివరించాలని అధికారులకు సూచించారు.

నీటి వృథా నివారణపై దృష్టి

ప్రస్తుత పరిస్థితుల్లో ప్రతి నీటి బొట్టు విలువైనదని పేర్కొన్న పవన్ కళ్యాణ్, కాలువల్లో పూడిక తొలగించడం, గట్ల లీకేజీలను మరమ్మతు చేయడం వంటి చర్యల ద్వారా నీటి వృథాను అరికట్టాలని సూచించారు. ముఖ్యంగా కాకినాడ జిల్లా, పిఠాపురం నియోజకవర్గంపై ప్రత్యేక దృష్టి సారించి రైతులకు అవసరమైన సహాయ సహకారాలు అందేలా చూడాలని కోరారు.

పవన్ కళ్యాణ్ ఆరోగ్యంపై మంత్రి పరామర్శ

సమావేశానికి ముందు భుజం గాయానికి శస్త్రచికిత్స చేయించుకున్న ఉప ముఖ్యమంత్రి పవన్ కళ్యాణ్‌ను మంత్రి నిమ్మల రామానాయుడు పరామర్శించారు. ఆయన ఆరోగ్య పరిస్థితిని అడిగి తెలుసుకుని, త్వరగా కోలుకుని తిరిగి ప్రజాసేవలో మరింత చురుకుగా పాల్గొనాలని ఆకాంక్షించారు.