అనారోగ్యంతో కల్కి భగవాన్ కన్నుమూత
చెన్నై ప్రైవేటు ఆస్పత్రిలో తుదిశ్వాస
మూడు రోజుల పాటు ఏకం క్షేత్రంలో భక్తుల దర్శనార్థం భౌతికకాయం
Kalki Bhagavan passes away.
శోకసంద్రంలో భక్తులు.. మూగబోయిన ఏకం క్షేత్రం
తిరుపతి జిల్లా, సెప్టెంబర్ 30 (వాయిస్ టుడే): ప్రముఖ ఆధ్యాత్మిక గురువు, ఏకం సంస్థ వ్యవస్థాపకుడు కల్కి భగవాన్గా ప్రసిద్ధి చెందిన విజయకుమార్ నాయుడు (77) కన్నుమూశారు. కొంతకాలంగా అనారోగ్య సమస్యలతో బాధపడుతున్న ఆయన చెన్నైలోని ఓ ప్రైవేటు ఆస్పత్రిలో చికిత్స పొందుతూ మంగళవారం తుదిశ్వాస విడిచారు. ఈ విషయాన్ని ఆయన కుమారుడు ఎన్కేవీ కృష్ణాజీ వీడియో సందేశం ద్వారా వెల్లడించారు.
కల్కి భగవాన్ మృతితో తిరుపతి జిల్లా వరదయ్యపాళెం మండలం బత్తలవల్లంలోని ఏకం క్షేత్రంలో విషాద ఛాయలు అలుముకున్నాయి. భక్తులు, శిష్యులు తీవ్ర దిగ్భ్రాంతికి గురయ్యారు.
మూడు రోజుల పాటు అంతిమ దర్శనం
చెన్నై నుంచి కల్కి భగవాన్ భౌతికకాయాన్ని బుధవారం బత్తలవల్లంలోని ఏకం క్షేత్రానికి తరలించారు. భక్తులు, శిష్యులు చివరి దర్శనం చేసుకునేందుకు సెప్టెంబర్ 30 నుంచి మూడు రోజుల పాటు భౌతికకాయాన్ని ఏకం క్షేత్రంలో ఉంచుతున్నట్లు ట్రస్ట్ వర్గాలు తెలిపాయి. దేశ, విదేశాల నుంచి పెద్ద సంఖ్యలో భక్తులు తరలివచ్చే అవకాశం ఉన్న నేపథ్యంలో ప్రత్యేక ఏర్పాట్లు చేస్తున్నారు.
భక్తులు ప్రశాంతంగా తరలివచ్చి దర్శనం చేసుకోవాలని నిర్వాహకులు కోరారు. భక్తుల రద్దీని దృష్టిలో ఉంచుకుని పోలీసులు భద్రతా ఏర్పాట్లు చేస్తున్నారు.
వరదయ్యపాళెం కేంద్రంగా ఆధ్యాత్మిక ప్రస్థానం
విజయకుమార్ నాయుడు 1980వ దశకంలో చిత్తూరు జిల్లా కుప్పం ప్రాంతంలో ‘జీవాశ్రమం’ పేరుతో ప్రత్యామ్నాయ విద్యా విధానాన్ని ప్రోత్సహించే పాఠశాలను ప్రారంభించారు. విద్యార్థుల్లో ఆత్మపరిశీలన, వ్యక్తిత్వ వికాసానికి ప్రాధాన్యం ఇచ్చే విధంగా ఆ సంస్థను తీర్చిదిద్దారు. అనంతరం ఆయన ఆధ్యాత్మిక కార్యక్రమాలపై దృష్టి సారించారు.
1990వ దశకంలో ఆయన ఆధ్యాత్మిక ఉద్యమం విస్తరించింది. వరదయ్యపాళెం మండలం బత్తలవల్లం ప్రాంతం ఆధ్యాత్మిక కార్యకలాపాలకు ప్రధాన కేంద్రంగా మారింది. ఇక్కడ ఏర్పాటు చేసిన వన్నెస్ టెంపుల్ అనంతరం ‘ఏకం’ పేరుతో కొనసాగింది. ఈ ఉద్యమం ద్వారా దేశ, విదేశాల్లో పెద్ద సంఖ్యలో అనుచరులు ఏర్పడ్డారు.
తరువాత సంస్థ కార్యకలాపాల బాధ్యతలను ఆయన కుమారుడు ఎన్కేవీ కృష్ణాజీ, కోడలు ప్రీతా కృష్ణ నిర్వహిస్తున్నారు.
కల్కి భగవాన్ మృతి వార్తతో ప్రపంచవ్యాప్తంగా ఉన్న ఆయన అనుచరులు, భక్తులు సంతాపం వ్యక్తం చేస్తున్నారు.
