జనసేనలో చేరిన అనంత శ్రీరామ్ తల్లిదండ్రులు
పాలకొల్లు నియోజకవర్గంలో సర్పంచ్ ఎన్నికకు ఉమారాణి సిద్ధం
దొడ్డిపట్ల సర్పంచ్ అభ్యర్థిగా అనంత శ్రీరామ్ తల్లి
Anantha Sriram’s parents join Jana Sena
పాలకొల్లు: ప్రముఖ తెలుగు సినీ గీత రచయిత అనంత శ్రీరామ్ తల్లిదండ్రులు జనసేన పార్టీలో చేరారు. పశ్చిమగోదావరి జిల్లా పాలకొల్లు సమీపంలోని దొడ్డిపట్ల గ్రామానికి చెందిన చేగొండి వీర వెంకట సత్యనారాయణ మూర్తి, ఆయన భార్య ఉమారాణి జనసేనలో చేరగా, స్థానిక పార్టీ నాయకులు వారికి కండువాలు కప్పి పార్టీలోకి ఆహ్వానించారు. రానున్న సర్పంచ్ ఎన్నికల్లో దొడ్డిపట్ల అభ్యర్థిగా ఉమారాణి పోటీ చేయడానికి సిద్ధమవుతున్నారు.
జనసేన అధినేత, ఉప ముఖ్యమంత్రి పవన్ కల్యాణ్ పనితీరు, గ్రామాల అభివృద్ధిపై ఆయన చూపుతున్న శ్రద్ధ తమను ఆకర్షించాయని ఉమారాణి తెలిపారు. ఈ కారణంగానే తన భర్తతో కలిసి జనసేనలో చేరాలని నిర్ణయించుకున్నట్లు చెప్పారు.
తన తల్లిదండ్రుల నిర్ణయం మేరకు వారు జనసేనలో చేరేందుకు సహకరించినట్లు అనంత శ్రీరామ్ వెల్లడించారు. గ్రామాభివృద్ధే తమ ప్రధాన లక్ష్యమని పేర్కొన్నారు. పంచాయతీరాజ్ శాఖ ద్వారా గ్రామాల అభివృద్ధికి ఎంతో అవకాశం ఉంటుందని, ఆ శాఖ బాధ్యతలు నిర్వహిస్తున్న పవన్ కల్యాణ్ నిబద్ధతతో పనిచేస్తున్నారని అభిప్రాయపడ్డారు. ఆయన నాయకత్వంలోని పార్టీలో చేరడం గ్రామానికి మేలు చేస్తుందని తన తల్లిదండ్రులు భావించినట్లు తెలిపారు.
దొడ్డిపట్ల గ్రామానికి తన తల్లి సర్పంచ్గా ఎన్నికైతే అన్ని వర్గాల ప్రజలను కలుపుకొని అభివృద్ధి కార్యక్రమాలు చేపట్టాలన్నదే తమ సంకల్పమని అనంత శ్రీరామ్ చెప్పారు. ఒక పార్టీ, కులం, మతం, వర్గం అనే భేదాలు లేకుండా గ్రామస్థులంతా ఆమె అభ్యర్థిత్వానికి మద్దతు తెలుపుతున్నారని, ఏకగ్రీవ ఎన్నికకు ప్రయత్నాలు జరుగుతున్నాయని వెల్లడించారు.
దొడ్డిపట్ల గ్రామం మంత్రి నిమ్మల రామానాయుడు ప్రాతినిధ్యం వహిస్తున్న పాలకొల్లు నియోజకవర్గ పరిధిలో ఉంది. గతంలో జనసేన పార్టీ కోసం అనంత శ్రీరామ్ పాటలు రచించిన విషయం తెలిసిందే. ఆయన తల్లిదండ్రులు తాజాగా పార్టీలో చేరడం, తల్లి సర్పంచ్ ఎన్నికల బరిలో నిలవడానికి సిద్ధం కావడం స్థానికంగా ఆసక్తికరంగా మారింది.




