ఎగుమతిదారులకు కస్టమ్స్‌ పథకాలపై అవగాహన
అంతర్జాతీయ వాణిజ్యాన్ని ప్రోత్సహించడమే లక్ష్యం
ఐసీఐసీఐ బ్యాంక్‌ సహకారంతో ఎఫ్‌ఐఈఓ కార్యక్రమం
Creating awareness among exporters about customs schemes
హైదరాబాద్‌, అక్టోబర్‌ 9: అంతర్జాతీయ వాణిజ్యంలో ఎగుమతిదారులకు అందుబాటులో ఉన్న కస్టమ్స్‌ పథకాలు, సదుపాయాలపై అవగాహన కల్పించేందుకు ఫెడరేషన్‌ ఆఫ్‌ ఇండియన్‌ ఎక్స్‌పోర్ట్‌ ఆర్గనైజేషన్స్‌ (ఎఫ్‌ఐఈఓ) ఆధ్వర్యంలో హైదరాబాద్‌లో ఒకరోజు కార్యక్రమం నిర్వహించారు. ఐసీఐసీఐ బ్యాంక్‌ సహకారంతో అక్టోబర్‌ 9న జరిగిన ఈ కార్యక్రమంలో పథకాల ప్రయోజనాలు, అర్హతలు, దరఖాస్తు విధానాలు, అవసరమైన పత్రాలు, నిబంధనల అమలుపై నిపుణులు వివరించారు.
ఎగుమతిదారులు తమ వ్యాపారానికి అనువైన కస్టమ్స్‌ పథకాన్ని ఎంచుకోవడం, అర్హత మేరకు ప్రయోజనాలను పొందడం, ఎగుమతుల అనంతరం నిబంధనలను సక్రమంగా పాటించడం ద్వారా లావాదేవీల వ్యయాలను తగ్గించుకోవచ్చని పేర్కొన్నారు. తద్వారా అంతర్జాతీయ మార్కెట్‌లో పోటీతత్వాన్ని పెంచుకోవడంతో పాటు వ్యాపార విస్తరణకు అవకాశాలు మెరుగుపడతాయని వివరించారు.
కార్యక్రమంలో అడ్వాన్స్‌ ఆథరైజేషన్‌, డ్యూటీ ఫ్రీ ఇంపోర్ట్‌ ఆథరైజేషన్‌ (డీఎఫ్‌ఐఏ), ఎగుమతి ప్రోత్సాహక మూలధన వస్తువుల పథకం (ఈపీసీజీ), బాండెడ్‌ తయారీ, గిడ్డంగుల నిర్వహణ, బాండ్‌/ఎల్‌యూటీ కింద ఎగుమతులు, అధీకృత ఆర్థిక ఆపరేటర్‌ (ఏఈఓ) విధానం, కస్టమ్స్‌ నిబంధనలు, డిజిటల్‌ కస్టమ్స్‌ సేవలు, ఐస్‌గేట్‌ విధానాలపై చర్చించారు.
ఈ కార్యక్రమానికి ఎగుమతిదారులు, తయారీదారులు, సూక్ష్మ, చిన్న, మధ్యతరహా పరిశ్రమల (ఎంఎస్‌ఎంఈ) ప్రతినిధులు, పారిశ్రామికవేత్తలు, వాణిజ్య నిపుణులు హాజరయ్యారు. అనంతరం నిర్వహించిన చర్చా కార్యక్రమంలో పాల్గొన్నవారు తమ వ్యాపార సమస్యలను వివరించి, వివిధ కస్టమ్స్‌ పథకాల వినియోగం ద్వారా ఎగుమతులను పెంచుకునే అవకాశాలపై చర్చించారు.
హైదరాబాద్‌ కస్టమ్స్‌ కమిషనరేట్‌ అసిస్టెంట్‌ కమిషనర్‌ డి. శ్రీ నాగేశ్‌ (ఐఆర్‌ఎస్‌), హైదరాబాద్‌ కస్టమ్స్‌ బ్రోకర్స్‌ అసోసియేషన్ అధ్యక్షుడు ఎస్‌. అనిల్‌ కుమార్‌, ఐసీఐసీఐ బ్యాంక్‌ జోనల్‌ హెడ్‌ శ్రీనివాస్‌ తాటికొండ, ప్రాంతీయ హెడ్‌ సీహెచ్‌ రాజు, ఎఫ్‌ఐఈఓ తెలంగాణ చాప్టర్‌ హెడ్‌ ఆర్‌. కులకర్ణి కార్యక్రమంలో ప్రసంగించారు.
ఎగుమతుల ప్రోత్సాహంలో ఎఫ్‌ఐఈఓ పాత్ర
కేంద్ర వాణిజ్య మంత్రిత్వ శాఖ ఆధ్వర్యంలో 1965లో స్థాపించిన ఎఫ్‌ఐఈఓ, దేశంలోని ప్రభుత్వ గుర్తింపు పొందిన ఎగుమతి ప్రోత్సాహక మండళ్లు, వస్తు బోర్డులు, అభివృద్ధి సంస్థలకు అత్యున్నత సమాఖ్యగా పనిచేస్తోంది. ఎగుమతిదారులకు మార్కెట్‌ పరిశోధన, వాణిజ్య సమాచారం, విదేశీ వాణిజ్య ప్రదర్శనలు, శిక్షణ కార్యక్రమాలు, ఎగుమతుల ప్రోత్సాహం, విధానపరమైన సూచనలు వంటి సేవలను అందిస్తోంది.
