వరంగల్ లో మందుల దందా..

వరంగల్ లో మందుల దందా..
వరంగల్, మార్చి 23
వరంగల్ రీజినల్​ ఐ హాస్పిటల్ (ప్రాంతీయ నేత్ర వైద్యశాల)లో మందులదందా బయటపడింది. అందులో పని చేసే ఉద్యోగి ఒకరు ప్రభుత్వం సరఫరా చేసే మందులను ప్రైవేటు మెడికల్​ స్టోర్​ లకు అమ్ముకుంటున్నాడు.కొన్ని సంవత్సరాల నుంచి ఈ దందా సాగిస్తూ అక్రమంగా సంపాదిస్తుండగా.. వరంగల్ టాస్క్​ ఫోర్స్ పోలీసులు, డ్రగ్​ కంట్రోల్​ ఆఫీసర్లు ఆయన గుట్టురట్టు చేశారు. ఈ మేరకు ప్రభుత్వ మందులు బయటకు పంపిస్తున్న ఉద్యోగితో పాటు ఆయన నుంచి కొనుగోలు చేస్తున్న వ్యక్తిని అరెస్ట్​ చేశారు.వరంగల్ నగరంలో కాశీబుగ్గ ప్రాంతానికి చెందిన తలకోటి నాగేందర్​ కొన్నేళ్ల నుంచి వరంగల్ రీజినల్​ కంటి ఆసుపత్రిలో ఫార్మాసిస్ట్ గా పని చేస్తున్నాడు. ఈ క్రమంలో వచ్చే జీతంతో సంతృప్తి పడని ఆయన ఆసుపత్రిలోనే అక్రమ దందాకు తెరలేపాడు.హనుమకొండలోని సెంట్రల్​ డ్రగ్​ స్టోర్ నుంచి కంటి ఆసుపత్రికి ట్యాబ్లెట్స్​, ఐ డ్రాప్స్​ తదితర మందులు సరఫరా అవుతుండగా.. వాటితో నాగేందర్ అక్రమ బిజినెస్​ మొదలు పెట్టాడు. వివిధ ప్రాంతాల నుంచి కంటి సమస్యలతో వచ్చే పేషెంట్లకు డాక్టర్లు మందులు రాస్తుండగా.. ప్రిస్క్రిప్షన్​ లో రాసిన వాటికంటే ఎక్కువ క్వాంటిటీ మందులు లెక్కల్లో చూపిస్తూ వాటిని గుట్టుగా తన ఇంటికి చేరవేసేవాడు.కంటి ఆసుపత్రిలో ఫార్మసిస్ట్​ గా పని చేస్తున్న నాగేందర్​ కు, హైదరాబాద్​ కు చెందిన బలరాం దాసుతో పరిచయం ఏర్పడింది. నాగేందర్​ తాను ఆసుపత్రి నుంచి తీసుకొచ్చే మందులను బలరాంకు అప్పజెప్తే ఆయన వాటిని హైదరాబాద్​కు తీసుకెళ్లేవాడు. అక్కడ ప్రభుత్వానికి సంబంధించిన స్టిక్కర్లు తొలగించి, ఆ మందులన్నింటినీ వివిధ మెడికల్​ స్టోర్​ లకు ఎక్కువ ధరకు సరఫరా చేసేవాడు.ఇలా ఇద్దరు కలిసి గుట్టుగా చిన్నపాటి నెట్​ వర్కే నడిపించారు. కొన్ని సంవత్సరాలుగా ఈ దందా సాగిస్తూ ఇద్దరూ పెద్ద మొత్తంలో సంపాదించారు. కాగా ఇండెంట్​ పెట్టిన మందులు పెద్ద మొత్తంలో మాయమవుతున్నా అక్కడి అధికారులకు అనుమానం కలగకపోవడం కూడా అనుమానాలకు తావిస్తోంది.ప్రజలకు ఉచితంగా పంపిణీ చేసే ప్రభుత్వ కంటి సంబంధిత మందులను అక్రమంగా కాజేసి డబ్బులకు బయట అమ్ముతున్న విషయం టాస్క్​ ఫోర్స్​ పోలీసులకు తెలిసింది. దీంతో వరంగల్ టాస్క్​ ఫోర్స్​ సిబ్బంది, డ్రగ్​ కంట్రోల్​ ఆఫీసర్లు గుట్టుగా వివరాలు సేకరించారు. ఈ క్రమంలోనే బలరాం దాసు మందులు తీసుకెళ్లేందుకు హైదరాబాద్​ నుంచి వరంగల్ కు వచ్చినట్లు అధికారులకు సమాచారం అందింది.దీంతోనే టాస్క్​ ఫోర్స్​, డ్రగ్ కంట్రోల్​ ఆఫీసర్లు నాగేందర్​ ఇంట్లో ఆకస్మికంగా సోదాలు నిర్వహించారు. ఆ సమయంలో నాగేందర్​ ఇంట్లో పెద్ద మొత్తంలో కంటి ఆసుపత్రికి సంబంధించిన మందులు లభించాయి. దీంతో ఇద్దరిని రెడ్​ హ్యాండెడ్​ గా పట్టుకున్న అధికారులు తదుపరి విచారణ నిమిత్తం వారిని ఇంతేజార్​ గంజ్​ పోలీసులకు అప్పగించారు.డ్రగ్ ఇన్స్పెక్టర్ అరవింద్ పంచనామా నిర్వహించి ఆ మందులను స్వాధీనం చేసుకున్నారు. సీజ్​ చేసిన వాటిలో 34 బాక్సుల్లో రూ.69,360 విలువైన యాంటీ బయటిక్​ ట్యాబ్లెట్స్, రూ.11,484 విలువైన ఐ డ్రాప్స్​ ఉన్నాయి.కొన్నేళ్లుగా ఫార్మసిస్ట్​ నాగేందర్​ మందుల దందా చేస్తుండగా.. ఆసుపత్రికి చెందిన ఉన్నతాధికారుల పాత్రపై అనుమానాలు వ్యక్తమవుతున్నాయి. ఇన్నేళ్ల నుంచి నేరుగా ఫార్మసి నుంచే మందులు సరఫరా చేస్తుంటే ఆ విషయం ఆఫీసర్ల దృష్టికి రాకపోవడం పట్ల సందేహాలు వినిపిస్తున్నాయి.ఈ విషయంలో మరింత లోతుగా విచారణ జరిపితే అసలు వాస్తవాలు బయటపడతాయనే అభిప్రాయాలు వ్యక్తమవుతున్నాయి. మరి పోలీస్​ అధికారులు, డ్రగ్​ కంట్రోల్​ ఆఫీసర్లు ఎలాంటి చర్యలు తీసుకుంటారో చూడాలి.