“ఆరోగ్యం, విద్య, ఉపాధి రంగాల్లో ప్రజల సమస్యల పరిష్కారమే నా ప్రధాన అజెండా” – డాక్టర్ గడల శ్రీనివాసరావు

సోమాజిగూడ, హైదరాబాద్, జూన్ 10 (వాయిస్ టుడే): ప్రజాసేవను మరింత విస్తృత స్థాయిలో కొనసాగించాలనే సంకల్పంతోనే జనసేన పార్టీలో చేరినట్లు మాజీ తెలంగాణ హెల్త్ డైరెక్టర్ డాక్టర్ గడల శ్రీనివాసరావు తెలిపారు. బుధవారం సోమాజిగూడ ప్రెస్‌క్లబ్‌లో ఏర్పాటు చేసిన విలేకరుల సమావేశంలో ఆయన మాట్లాడుతూ, ప్రజల సమస్యలను ప్రత్యక్షంగా తెలుసుకుని వాటి పరిష్కారానికి రాజకీయ వేదిక అత్యంత సమర్థవంతమైన మార్గమని భావించినందున జనసేన పార్టీ అధ్యక్షుడు పవన్ కళ్యాణ్ నాయకత్వంలో పనిచేయాలని నిర్ణయించుకున్నట్లు వెల్లడించారు. ప్రభుత్వ వైద్యశాఖలో వివిధ హోదాల్లో పనిచేసిన అనుభవంతో ప్రజల ఆరోగ్య సమస్యలను దగ్గర నుంచి పరిశీలించే అవకాశం లభించిందన్నారు. ముఖ్యంగా కరోనా మహమ్మారి సమయంలో తెలంగాణ హెల్త్ డైరెక్టర్‌గా బాధ్యతలు నిర్వహిస్తూ ప్రజల కష్టసుఖాలను ప్రత్యక్షంగా చూశానని తెలిపారు. ఆ సమయంలో వైద్య సేవల లోపాలు, ఆరోగ్య మౌలిక వసతుల అవసరం, పేద ప్రజలు ఎదుర్కొన్న ఇబ్బందులు, యువతలో పెరుగుతున్న నిరుద్యోగం, విద్యా రంగంలోని సవాళ్లు తనకు స్పష్టంగా అర్థమయ్యాయని పేర్కొన్నారు. ప్రజల సంక్షేమం కోసం కేవలం ప్రభుత్వ ఉద్యోగిగా సేవలందించడం కంటే రాజకీయాల ద్వారా మరింత విస్తృత స్థాయిలో పనిచేసే అవకాశం ఉంటుందని భావించినట్లు ఆయన చెప్పారు. పేదలకు నాణ్యమైన ఉచిత వైద్యం, అందరికీ అందుబాటులో ఉండే విద్య, యువతకు ఉపాధి అవకాశాల కల్పన, గ్రామీణ ప్రాంతాల్లో ఆరోగ్య సేవల బలోపేతం వంటి అంశాలపై ప్రత్యేక దృష్టి సారించనున్నట్లు వెల్లడించారు. జనసేన పార్టీ సిద్ధాంతాలు, పారదర్శక రాజకీయాలకు కట్టుబడి ఉన్న పార్టీ అధ్యక్షుడు పవన్ కళ్యాణ్ అవలంబిస్తున్న ప్రజా కేంద్రిత విధానాలు తనను ఆకర్షించాయని ఆయన తెలిపారు. దేశంలో రాజకీయాలు ప్రజాసేవకు నిజమైన వేదికగా మారాల్సిన అవసరం ఉందన్నారు. రాజకీయ పార్టీలు పరస్పరం విభేదాలు కలిగి ఉండటం సహజమే అయినప్పటికీ, ప్రజా ప్రయోజనాల విషయంలో అందరూ కలిసి పనిచేయాల్సిన అవసరం ఉందని అభిప్రాయపడ్డారు. తెలంగాణలో ఆరోగ్యం, విద్య, ఉపాధి రంగాల్లో ప్రజల సమస్యలను ప్రభుత్వాల దృష్టికి తీసుకెళ్లడంలో చురుకైన పాత్ర పోషిస్తానని, తన అనుభవాన్ని జనసేన పార్టీ బలోపేతానికి వినియోగిస్తానని తెలిపారు. ప్రజల నమ్మకాన్ని నిలబెట్టుకునే పారదర్శక రాజకీయాలే దేశ భవిష్యత్తుకు అవసరమని, సమాజంలోని అన్ని వర్గాల అభివృద్ధే తన ప్రధాన లక్ష్యమని పేర్కొన్నారు. ఈ కార్యక్రమంలో బండి నరేష్, వేముల మహేష్, బైరప్పగు సాంబశివుడు, మిరియాల రామకృష్ణ, సురేష్ రెడ్డి, వినయ్, వినోద్ నాయుడు తదితరులు పాల్గొన్నారు.