ఏపీ గ్రీన్ ఎగ్జిక్యూటివ్ కమిటీ చైర్మన్గా నాగబాబు
ఎమ్మెల్సీ కొణిదెల నాగేంద్రరావుకు క్యాబినెట్ హోదా
పచ్చదనం, పునర్వనీకరణకు మరింత ప్రాధాన్యత
2047 నాటికి 50 శాతం గ్రీన్ కవర్ లక్ష్యం
Nagababu appointed as Chairman of AP Green Executive Committee.
అమరావతి, ఆగస్టు 17 (వాయిస్ టుడే):
ఆంధ్రప్రదేశ్లో పచ్చదనం పెంపు, అటవీ పరిరక్షణ, పర్యావరణ సమతుల్యతకు మరింత ప్రాధాన్యతనిస్తూ రాష్ట్ర ప్రభుత్వం కీలక నిర్ణయం తీసుకుంది. ‘ఆంధ్రప్రదేశ్ సొసైటీ ఫర్ గ్రీనింగ్ అండ్ రీఫారెస్టేషన్ ఫర్ ఎకలాజికల్ ఎన్రిచ్మెంట్ (ఏపీ గ్రీన్)’ ఎగ్జిక్యూటివ్ కమిటీ చైర్మన్గా ఎమ్మెల్సీ కొణిదెల నాగేంద్రరావు (నాగబాబు)ను ప్రభుత్వం నియమించింది.
ఈ మేరకు పర్యావరణ, అటవీ శాఖ G.O.Rt.No.93, తేదీ 17-08-2026ను జారీ చేసింది. ఏపీ గ్రీన్ ఎగ్జిక్యూటివ్ కమిటీ చైర్మన్గా నాగబాబుకు క్యాబినెట్ హోదా కల్పిస్తున్నట్లు ఉత్తర్వుల్లో ప్రభుత్వం స్పష్టం చేసింది. త్వరలో ఆయన బాధ్యతలు స్వీకరించనున్నారు.
2047 నాటికి 50 శాతం గ్రీన్ కవర్
రాష్ట్ర భౌగోళిక విస్తీర్ణంలో అటవీ, పచ్చదనం కలిపి 50 శాతానికి పెంచడం ఏపీ గ్రీన్ ప్రధాన లక్ష్యంగా ప్రభుత్వం నిర్దేశించింది. 2047 నాటికి ఈ లక్ష్యాన్ని సాధించే దిశగా కార్యక్రమాలను విస్తృతంగా చేపట్టనున్నారు.
రాష్ట్రవ్యాప్తంగా పచ్చదనం పెంపు, పునర్వనీకరణ, అటవీ పరిరక్షణ, పర్యావరణ పరిరక్షణ కార్యక్రమాలను సమన్వయంతో అమలు చేసేందుకు ఏపీ గ్రీన్ గవర్నింగ్ బోర్డు, ఎగ్జిక్యూటివ్ కమిటీతో పాటు జిల్లాస్థాయిలో పాలక మండళ్లను ఏర్పాటు చేయనున్నట్లు ప్రభుత్వం పేర్కొంది.
సమన్వయం, పర్యవేక్షణ కీలకం
ఏపీ గ్రీన్ కార్యక్రమాల అమలులో వివిధ ప్రభుత్వ శాఖలు, జిల్లాస్థాయి సంస్థల మధ్య సమన్వయం సాధించడం, కార్యక్రమాలను వేగవంతం చేయడం, వాటి పురోగతిని పర్యవేక్షించడం వంటి కీలక బాధ్యతలను ఎగ్జిక్యూటివ్ కమిటీ చైర్మన్గా నాగబాబు నిర్వహించనున్నారు.
ప్రత్యేకంగా రాష్ట్రవ్యాప్తంగా చేపట్టే పునర్వనీకరణ, మొక్కల పెంపకం, పర్యావరణ పరిరక్షణ కార్యక్రమాలను జిల్లాస్థాయి వ్యవస్థలతో అనుసంధానం చేసి సమర్థవంతంగా అమలు చేయడంలో ఆయన పాత్ర కీలకం కానుంది.
పచ్చని ఆంధ్రప్రదేశ్ లక్ష్యంగా..
రాష్ట్ర భవిష్యత్ అవసరాలను దృష్టిలో ఉంచుకుని పర్యావరణ సమతుల్యతను కాపాడటం, అడవులు–చెట్ల విస్తీర్ణాన్ని పెంచడం, పునర్వనీకరణ కార్యక్రమాలను విస్తృత స్థాయిలో చేపట్టడం వంటి అంశాలకు ప్రభుత్వం ప్రాధాన్యత ఇస్తోంది.
“పచ్చని ఆంధ్రప్రదేశ్ – ఆరోగ్యకరమైన ఆంధ్రప్రదేశ్” లక్ష్య సాధనలో ఏపీ గ్రీన్ కీలకంగా పనిచేయనుందని కూటమి భాగస్వామ్య పార్టీల నేతలు ఆశాభావం వ్యక్తం చేస్తున్నారు.
నాగబాబు నాయకత్వంలో రాష్ట్రవ్యాప్తంగా పచ్చదనం, అటవీ పరిరక్షణ, పర్యావరణ కార్యక్రమాలు మరింత సమర్థవంతంగా ముందుకు సాగుతాయని వారు పేర్కొన్నారు.
