కొత్తగూడెంలో బీఆర్ఎస్ శ్రేణులకు ఎంపీ వద్దిరాజు దిశానిర్దేశం
ఎమ్మెల్సీ తక్కళ్లపల్లి, మాజీ మంత్రి వనమా వెంకటేశ్వరరావుతో కలిసి సమావేశం
పట్టభద్రుల ఎమ్మెల్సీ ఎన్నికకు ఇప్పటి నుంచే క్షేత్రస్థాయిలో ప్రచారం
తెలంగాణ హక్కుల కోసం పోరాడేది బీఆర్ఎస్ ఒక్కటే
BRS is the ultimate safeguard for Telangana’s future: MP Vaddiraju
కొత్తగూడెం (వాయిస్ టుడే): ప్రత్యేక తెలంగాణ రాష్ట్రాన్ని సాధించి, రాష్ట్రాన్ని అన్ని రంగాల్లో అభివృద్ధి చేసిన బీఆర్ఎస్‌నే తెలంగాణ ప్రజల ఇంటి పార్టీ అని బీఆర్ఎస్ పార్లమెంటరీ పార్టీ లీడర్, ఎంపీ వద్దిరాజు రవిచంద్ర అన్నారు. బీఆర్ఎస్ అధినేత, మాజీ ముఖ్యమంత్రి కేసీఆర్ నాయకత్వమే తెలంగాణకు శ్రీరామరక్ష అని పేర్కొన్నారు. ప్రజలు ఎదుర్కొంటున్న సమస్యల పరిష్కారం, సంక్షేమం, రాష్ట్ర హక్కుల కోసం స్పష్టమైన కార్యాచరణతో పోరాడుతున్న ఏకైక పార్టీ బీఆర్ఎస్ అని అన్నారు.
శాసనమండలిలోని నల్లగొండ-ఖమ్మం-వరంగల్ పట్టభద్రుల నియోజకవర్గ ఎన్నికల నేపథ్యంలో భద్రాద్రి కొత్తగూడెం జిల్లా పార్టీ కార్యాలయం తెలంగాణ భవన్‌లో మంగళవారం బీఆర్ఎస్ సమావేశం నిర్వహించారు. ఈ సమావేశానికి ఎంపీ వద్దిరాజు రవిచంద్ర, ఎమ్మెల్సీ తక్కళ్లపల్లి రవీందర్ రావు, మాజీ మంత్రి వనమా వెంకటేశ్వరరావు, పార్టీ నాయకుడు అనుగుల రాకేష్ రెడ్డి తదితరులు హాజరై కొత్తగూడెం నియోజకవర్గ పార్టీ సమన్వయకర్తలకు దిశానిర్దేశం చేశారు.
ఈ సందర్భంగా ఎంపీ రవిచంద్ర మాట్లాడుతూ.. తెలంగాణ నుంచి కాంగ్రెస్, బీజేపీ తరఫున గెలిచిన ఎంపీలు ఢిల్లీలో రాష్ట్ర సమస్యలపై మాట్లాడటం లేదని విమర్శించారు. పార్లమెంట్ లోపల, బయట తెలంగాణ ప్రజల తరఫున గళమెత్తుతూ, రాష్ట్రానికి రావాల్సిన న్యాయమైన హక్కుల కోసం బీఆర్ఎస్ పోరాడుతోందన్నారు.
కాంగ్రెస్ హామీల అమలు ఎక్కడ?
ఎన్నికల సమయంలో కాంగ్రెస్ నాయకులు ఆర్భాటంగా డిక్లరేషన్లు, హామీలు ప్రకటించి అధికారంలోకి వచ్చిన తర్వాత వాటి అమలును పక్కన పెట్టారని ఎంపీ విమర్శించారు. రేవంత్ రెడ్డి ప్రభుత్వం ఇప్పటివరకు కేవలం 12 వేల ఉద్యోగాలు మాత్రమే భర్తీ చేసిందని ఆరోపించారు. గత బీఆర్ఎస్ ప్రభుత్వ హయాంలో మంజూరైన, భర్తీ చేసిన ఉద్యోగాలను కూడా తమ ఖాతాలో వేసుకుని ప్రభుత్వం ప్రచారం చేసుకుంటోందని అన్నారు.
రాహుల్ గాంధీ, ప్రియాంక గాంధీ హైదరాబాద్‌కు వచ్చిన సందర్భాల్లో నిరుద్యోగ యువతకు ఇచ్చిన హామీలను అమలు చేయలేదని పేర్కొన్నారు. నిరుద్యోగులకు నెలకు రూ.4 వేల భృతి ఇస్తామని ఇచ్చిన హామీ ఏమైందని ప్రశ్నించారు. రాష్ట్ర ప్రభుత్వం విద్యార్థులకు సుమారు రూ.13 వేల కోట్ల ఫీజు రీయింబర్స్‌మెంట్ బకాయిలు చెల్లించాల్సి ఉందని అన్నారు. ఉద్యోగులు, పింఛనుదారులకు ఇవ్వాల్సిన డీఏలు, ఇతర ప్రయోజనాలను కూడా విడుదల చేయడం లేదని విమర్శించారు.
కేసీఆర్ హయాంలోనే హైదరాబాద్ అభివృద్ధి
కేసీఆర్ మార్గదర్శకత్వంలో కేటీఆర్ కృషి కారణంగా హైదరాబాద్‌కు అనేక బహుళజాతి సంస్థలు తరలివచ్చాయని, తద్వారా పెద్ద సంఖ్యలో యువతకు ఉద్యోగావకాశాలు లభించాయని ఎంపీ రవిచంద్ర పేర్కొన్నారు. ఫార్మా రంగాన్ని మరింత అభివృద్ధి చేసేందుకు కేసీఆర్ ప్రభుత్వం రంగారెడ్డి జిల్లా ముచ్చర్ల వద్ద వేలాది ఎకరాలు సమీకరించి ప్రణాళికలు రూపొందించిందని, ఇప్పుడు వాటినే ఫ్యూచర్ సిటీ పేరుతో ప్రచారం చేసుకోవడం సరికాదన్నారు.
వాతావరణ మార్పుల ప్రభావంతో ఎండలు తీవ్రతరమవుతున్న సమయంలో గోదావరి వరద జలాలను సమర్థంగా వినియోగించుకునేందుకు ప్రభుత్వం చర్యలు తీసుకోవడం లేదని విమర్శించారు.
కాంగ్రెస్ పాలనపై రైతులు, విద్యార్థులు, నిరుద్యోగ యువత, ఉద్యోగులు, ఉపాధ్యాయులు, మహిళలు, కార్మికులు సహా వివిధ వర్గాలు అసంతృప్తితో ఉన్నాయని ఎంపీ అన్నారు. ఉమ్మడి ఖమ్మం జిల్లాకు చెందిన మంత్రులు ప్రజా సంక్షేమాన్ని పక్కన పెట్టి ఇతర వ్యవహారాల్లో నిమగ్నమయ్యారని ఆరోపించారు.
కేసీఆర్ హయాంలోనే కొత్తగూడెం అభివృద్ధి
భద్రాద్రి కొత్తగూడెం జిల్లాను ఏర్పాటు చేయడంతో పాటు జిల్లా కలెక్టరేట్ నిర్మాణం, సీతారామ ఎత్తిపోతల పథకం, భక్త రామదాసు ఎత్తిపోతల పథకం, మెడికల్, నర్సింగ్ కళాశాలలు, రహదారుల అభివృద్ధి, సెంట్రల్ లైటింగ్ వంటి అనేక అభివృద్ధి కార్యక్రమాలు కేసీఆర్ హయాంలోనే జరిగాయని ఎంపీ రవిచంద్ర వివరించారు.
పట్టభద్రుల ఓట్ల నమోదుపై ప్రత్యేక దృష్టి
బీఆర్ఎస్ వర్కింగ్ ప్రెసిడెంట్ కేటీఆర్ సూచనలు, సలహాల మేరకు ఎమ్మెల్సీ ఎన్నికలను ప్రతిష్టాత్మకంగా తీసుకోవాలని పార్టీ శ్రేణులకు సూచించారు. డాక్టర్లు, ఉపాధ్యాయులు, అధ్యాపకులు, ఉద్యోగులు, న్యాయవాదులు, రిటైర్డ్ ఉద్యోగులు, పాత్రికేయులు, ఎల్ఐసీ ఏజెంట్లు తదితర పట్టభద్రులను వ్యక్తిగతంగా కలిసి ఓటు నమోదు చేయించాలని పిలుపునిచ్చారు.
ఈ సమావేశంలో పార్టీ నాయకులు కాపు సీతామహాలక్ష్మి, వేల్పుల దామోదర్, రాజుగౌడ్, శాంతినాయక్ తదితరులు పాల్గొన్నారు. ఈ సందర్భంగా ‘జై తెలంగాణ.. జైజై తెలంగాణ’, ‘జిందాబాద్.. జిందాబాద్.. బీఆర్ఎస్ జిందాబాద్’, ‘వర్ధిల్లాలి.. వర్ధిల్లాలి.. కేసీఆర్ నాయకత్వం వర్ధిల్లాలి’ అంటూ పార్టీ శ్రేణులు నినాదాలు చేశారు.
