*ఎన్నికల ప్రచారంలో యువతికి ముద్దుపెట్టిన ఎంపీ‼️*
*వివాదంలో చిక్కుకున్న ఎంపీ‼️*
బెంగాల్లోని ఉత్తర మాల్దా లోక్సభ నియోజకవర్గం నుంచి భాజపా ఎంపీ ఖగేన్ ముర్మూ పోటీ చేస్తున్నారు. గత సోమవారం తన నియోజక పరిధిలోని శ్రిహిపుర్ గ్రామంలో ఇంటింటి ప్రచారానికి వెళ్లారు. అక్కడ ఆయన *ఓ యువతి చెంపపై ముద్దు పెట్టిన దృశ్యాలు సామాజిక మాధ్యమాల్లో* వైరల్ అయ్యాయి. దీంతో ఈ ఘటన రాజకీయ దుమారం రేపింది.
దీనిపై అధికార తృణమూల్ కాంగ్రెస్ సోషల్ మీడియాలో స్పందిస్తూ.. భాజపాను దుయ్య బట్టింది. “భాజపా ఎంపీ, ఉత్తర మాల్దా అభ్యర్థి ఖగేన్ ముర్ము ప్రచారం సందర్భంగా ఓ యువతికి ముద్దు పెట్టారు. మహిళా రెజ్లర్లను లైంగికంగా వేధించే ఎంపీలు.. బెంగాలీ మహిళలపై అసభ్యకర పాటలు రాసే నేతలు.. ఇలా భాజపా క్యాంప్ మహిళా వ్యతిరేక నాయకులకు కొదవలేదు. నారీమణులకు ‘మోదీ పరివార్’ ఇస్తున్న గౌరవం ఇది. ఒకవేళ వారు అధికారంలోకి వస్తే ఇలాంటివి ఇంకెన్ని చేస్తారో ఊహించుకోండి..!” అని టీఎంసీ విమర్శ గుప్పించింది.
ఇది వివాదం కావడంతో ఎంపీ ఖగేన్ స్పందిస్తూ ఘటనపై స్పష్టతనిచ్చారు. “ఆమెను నా కుమార్తెలా భావించా. పిల్లలకు ముద్దు పెడితే తప్పేంటి? కుట్రపూరితంగా దీనిపై వివాదం సృష్టిస్తున్నారు. ఇలాంటి చిత్రాలను వక్రీకరించి వ్యక్తులు, పార్టీల పరువుకు భంగం కలిగిస్తున్నారు. వారిపై (టీఎంసీ) ఫిర్యాదు చేస్తాం” అని భాజపా నేత వెల్లడించారు.
మరోవైపు, యువతి కూడా దీనిపై స్పందిస్తూ ఎంపీకి మద్దతుగా వ్యాఖ్యలు చేశారు. “సొంత కుమార్తెలా భావించి ఆయన ముద్దు పెట్టుకుంటే అందులో సమస్య ఏంటి? ఇలాంటి ఘటనలను సోషల్ మీడియాలో వైరల్ చేసే వారిది చెత్త మనస్తత్వం. ఆ ఫొటో తీసిన సమయంలో మా అమ్మానాన్నా కూడా అక్కడే ఉన్నారు” అని ఆమె చెప్పారు.